Jul 112018
 

صبر کا پیمانہ لبریز ہوا تو ملک اور سسٹم کو نقصان پہنچے گا، اسفندیار ولی خان

اے این پی کو انتخابی عمل سے آؤٹ کرنے کیلئے سازش کی جا رہی ہے، میدان خالی نہیں چھوڑیں گے

ہارون بشیر بلور پر حملہ انتخابی عمل پر نہیں بلکہ اے این پی کو الیکشن عمل سے باہر کرنے کی سازش کا حصہ ہے۔

پیٹھ پر وار بزدل کرتے ہیں، دشمن میں غیرت ہے تو سامنے آ کر وار کرے ہم بھی بھرپور جواب دیں گے۔

تین روزہ سوگ میں انتخابی سرگرمیاں معطل رہیں گی ،سوئم کے بعد انتخابی میدان میں نکلیں گے۔

عظیم سانحہ کے بعد شفاف اور غیر جانبدارانہ الیکشن کے دعوؤں میں اب کوئی حقیقت نہیں رہی۔

ہمارے تحفظات بڑھتے جا رہے ہیں ، بلور ہاؤس میں میڈیا سے بات چیت

پشاور ( پ ر ) عوامی نیشنل پارٹی کے مرکزی صدر اسفندیار ولی خان نے کہا ہے کہ اے این پی کو انتخابی عمل سے آؤٹ کرنے کیلئے سازش کی جا رہی ہے ، بہت صبر کر لیا اگر ہمارے صبر کا پیمانہ لبریز ہوا تو ملک اور سسٹم کیلئے نقصان دہ ثابت ہو گا، ان خیالات کا اظہار انہوں نے بلور ہاؤس پشاور میں ہارون بلور کی شہادت پر میڈیا سے بات چیت کرتے ہوئے کیا ، انہوں نے کہا کہ دشمن میں غیرت ہے تو سامنے آ کر وار کرے ہم بھی بھرپور جواب دیں گے ، چھپ کر پیٹھ پر وار کرنے والے غیرت مند نہیں بزدل لوگ ہیں ، انہوں نے کہا کہ میدان خالی نہیں چھوڑیں گے اور الیکشن میں بھرپور طریقے سے حصہ لیں گے ، ایک سوال کے جواب میں انہوں نے کہا کہ ہارون بشیر بلور پر حملہ انتخابی عمل پر نہیں بلکہ اے این پی کو الیکشن عمل سے باہر کرنے کی سازش کا حصہ ہے تاہم دشمن کچھ بھی کر لے ہم ڈٹے رہیں گے اور میدان خالی نہیں چھوڑیں گے ، انہوں نے کہا کہ2013میں بھی دہشت گردوں نے ہمیں دیوار سے لگانے کیلئے ٹارگٹ کیا لیکن اب 2013نہیں یہ 2018ہے اور اے این پی کسی صورت دشمنوں کی سازش کے سامنے نہیں جھکے گی، اسفندیار ولی خان نے تین روزہ سوگ کا اعلان کرتے ہوئے کہا کہ انتخابی سرگرمیاں معطل رہیں گی اور تین دن بعد معمول کے مطابق انتخابی میدان میں نکلیں گے ،انہوں نے امید ظاہر کی کہ عظیم سانحہ پر دیگر سیاسی جماعتیں بھی اظہار یک جہتی کے طور پر سیاسی سرگرمیاں معطل کریں گی ، ایک اور سوال کے جواب میں اسفندیار ولی خان نے کہا کہ اتنے بڑے سانحے کے بعد بھی کوئی کہہ سکتا ہے کہ یہ شفاف اور غیر جانبدارانہ انتخابات ہیں؟ ہمارے تحفظات بڑھتے جا رہے ہیں اور اگر صبر کا پیمانہ لبریز ہوا تو ملک اور سسٹم کو نقصان پہنچے گا، بلور فیملی پر حملوں سے متعلق ایک سوال کے جواب میں انہوں نے کہا کہ دشمن جانتا ہے کہ جب تک بلور خاندان ہے پشاور پر کوئی قبضہ نہیں کر سکتا ، انہوں نے بشیر احمد بلور شہید اور ان کے فرزند ہارون بلور شہید کی قربانیوں کو خراج عقیدت پیش کیا اور کہا کہ ان لازوال قربانیوں کے نتیجے میں ملک امن کا گہوارہ ضرور بنے گا۔انہوں نے سانحے میں شہید ہونے والے تمام افراد کے لواحقین سے بھی دلی تعزیت اور ہمدردی کا اظہار کرتے ہوئے تمام شہداء کی مغفرت اور لواحقین کے صبر جمیل کیلئے دعا کی۔

[suffusion-the-author]

[suffusion-the-author display='description']