May 142018
 

اے این پی نے مستحکم ملک کی خاطر کبھی کسی غیر جمہوری قوت کا ساتھ نہیں دیا، اسفندیار ولی خان

بارہ مئی سیاسی تاریخ کا سیاہ ترین دن ہے ، شہید کارکنوں کی قربانیاں رائیگاں نہیں جائیں گی۔

عوام کی لاشیں گرانے والے چہرے بے نقاب ہو چکے تھے بد قسمتی سے ان کے خلاف کوئی کاروائی نہیں کی گئی۔

معصوم انسانی جانوں کے ذریعے سیاسی ایجنڈے کی تکمیل میں مصروف وطن دشمنوں کا سیاست سے تعلق نہیں ہے ۔

 پاکستان میں جمہوری نظام کے بغیر کوئی نظام نہیں چل سکتا،قاتلوں کا ساتھ دینے والے عوام کا سامنا نہیں کر سکیں گے۔

پشاور ( پ ر )عوامی نیشنل پارٹی کے مرکزی صدر اسفندیار ولی خان نے کہا ہے کہ اے این پی جمہوریت کی بالادستی پر یقین رکھنے والی جماعت ہے اور مستحکم ملک و جمہوری استحکام کیلئے کبھی کسی غیر جمہوری قوت کا ساتھ نہیں دیا،12مئی 2007ء کوکراچی سانحے کے حوالے سے اے این پی سیکرٹریٹ سے جاری ایک بیان میں پارٹی کے مرکزی صدر نے کہا کہ اے این پی نے ہمیشہ امن کی خاطر جانوں کے نذرانے پیش کئے ہیں اور یہ سلسلہ ہنوز جاری ہے ، انہوں نے کہا کہ 12مئی کونہتے کارکنوں کی جانیں لینے والوں کے چہرے بے نقاب ہو چکے تھے تاہم افسوس کا مقام ہے کہ آج تک ان کے خلاف کوئی کاروائی نہیں کی گئی انہوں نے کہا کہ تاریخ کے اس سیاہ دن پر اے این پی کے جن کارکنوں نے قربانی دی ان جام شہادت نوش کرنے والے شہدا کی قربانیاں رائیگاں نہیں جائیں گی، انہوں نے کہا کہ معصوم انسانی جانوں کے ذریعے سیاسی ایجنڈے کی تکمیل میں مصروف وطن دشمنوں کا سیاست سے تعلق نہیں ہے ۔اسفندیار ولی خان نے کہا کہ اب بھی وقت ہے کہ دہشت گردی کے خلاف پوری قوم متحد ہو کر اٹھ کھڑی ہو تا کہ آنے والی نسلوں کوایک مضبوط اور مستحکم ملک منتقل کیا جا سکے ، ا نہوں نے کہا کہ دہشت گردی کے خلاف عوامی نیشنل پارٹی کی قربانیاں کسی سے ڈھکی چھپی نہیں اور تاریخ گواہ ہے کہ خطے میں امن کی بحالی کیلئے اے این پی کے عظیم رہنماؤں ، ایم پی ایز اور کارکنوں نے قربانیاں دی ہیں ، انہوں نے کہا کہ پاکستان میں جمہوری نظام کے بغیر کوئی نظام نہیں چل سکتا اور ہماری تاریخ گواہ ہے کہ ہم نے ماضی میں بھی کبھی کسی غیر جمہوری قوت کا ساتھ نہیں دیا اور نہ ہی مستقبل میں کبھی ایسا کرینگے انہوں نے کہا کہ دہشت گردی کے خاتمے کیلئے ہم نے جو قربانیاں دی ہیں وہ کبھی رائیگاں نہیں جائینگی انہوں نے کہا کہ ہم ان قوتوں کو باور کرانا چاہتے ہیں جنہوں نے 12مئی کے سانحے میں قاتلوں کا ساتھ دیا کہ وہ کبھی عوام کا سامنا نہیں کر سکیں گے ۔

[suffusion-the-author]

[suffusion-the-author display='description']