خطہ عالمی مفادات کی بھینٹ چڑھ گیا ہے ، اے این پی بے روزگاری اور غربت کے خلاف جنگ ٹھوس بنیادوں پر لڑے گی

 خطہ عالمی مفادات کی بھینٹ چڑھ گیا ہے ، اے این پی بے روزگاری اور غربت کے خلاف جنگ ٹھوس بنیادوں پر لڑے گی، سردار حسین بابک

پشاور ( پ ر ) عوامی نیشنل پارٹی کے صوبائی جنرل سیکرٹری سردار حسین بابک نے کہا ہے کہ خطہ عالمی مفادات کی بھینٹ چڑھ گیا ہے ، مستقبل میں بے روزگاری ، جہالت ،اور غربت کے خلاف جنگ ٹھوس بنیادوں پر لڑی جائے گی،خوشحال خیبر پختونخوا اے این پی کا مشن ہے اور الیکشن میں کامیابی کے بعد تمام محکموں کی کارکردگی بہتر بنانے کیلئے ہنگامی طور پر کام کیا جائے گا، ان خیالات کا اظہار انہوں نے باچا خان مرکز میں دیر لوئر کے پارٹی عہدیداروں اور کارکنوں کے اجلاس سے کطاب کرتے ہوئے کیا، انہوں نے کہا کہ الیکشن کیلئے درخواستوں کی وصول جاری ہے تاہم پارلیمانی بورڈ کا فیصلہ حتمی ہو گا اور انشاء اللہ ہر ٹکٹ کیلئے فیصلہ عوامی امنگوں کے مطابق کیا جائے گا، انہوں نے کہا کہ موجودہ دور ہم سے اتحاد و اتفاق کا متقاضی ہے اور پختونوں کو چاہئے کہ وہ اپنے حقوق کے تحفظ کیلئے اے این پی کے سرخ جھنڈے تلے متحد ہو جائیں ، انہوں نے کہا کہ عوام کے کئی حل طلب مسائل پانامہ کی وجہ سے مدفون ہو چکے تھے تاہم اب پانامہ کا ہنگامہ ختم ہونے کے بعد حکومت کو عوامی مسائل پر توجہ دینا چاہئے ، انہوں نے کہا کہ تمام سیاسی و مذہبی جماعتوں کے لوگوں کا نام اب بھی پانامہ میں موجود ہے جبکہ اے این پی واحد سیاسی جماعت ہے جس کے کسی رہنما کا اس میں ذکر نہیں ، انہوں نے کہا کہ کرپشن کے ا لزامات لگانے والے خود سر سے پاؤں تک کرپشن کی دلدل میں دھنسے ہیں،سردار حسین بابک نے کہا کہ بلین سونامی ٹری ، صحت اور تعلیم کے شعبوں میں حکومت نے کروڑوں روپیہ لوٹ لیا ہے اور وہ خزانہ جو اے این پی نے اقتدار چھوڑتے وقت بھرا چھوڑا تھا آج اس میں پھوٹی کوڑی تک نہیں ، انہو ں نے کہا کہ صوبے کی تاریخ میں جتنے قرضے اس حکومت نے لئے ہیں وہ ایک ریکارڈ ہے ، اے این پی رابطہ عوام مہم کے دوران یہ تمام حقائق عوام کے سامنے رکھے گی، انہوں نے کہاکہ صوبائی حکومت عوام کی توقعات پر پورا اترنے میں ناکام ہو چکی ہے یہی وجہ ہے کہ اہم سیاسی شخصیات اور عوام کی اے این پی میں جوق در جوق شمولیتوں کا سلسلہ جاری ہے اور لوگ اب تبدیلی کی حقیقت جان کر صوبائی حکومت سے متنفر ہو چکے ہیں، انہوں نے کہا کہ صوبے کو مالی و انتظامی طور پر دیوالیہ کر دیا گیا ہے جبکہ 28ارب روپے کی کرپشن کی داستان زبان زد عام ہے ، انہوں نے کہا کہ اے این پی آئندہ الیکشن میں کامیابی کے بعد صوبے میں ترقی کا عمل شروع کرے گی اور عوام کو ان کے حقوق ان کی دہلیز پر فراہم کئے جائیں گے۔

Facebook Comments