لندن میں شہید ہونے والے سید عظیم خان کے قاتل کو جلد کیفر کردار تک پہنچایا جائے

لندن میں شہید ہونے والے سید عظیم خان کے قاتل کو جلد کیفر کردار تک پہنچایا جائے، میاں افتخار حسین

پشاور ( پ ر ) عوامی نیشنل پارٹی کے مرکزی جنرل سیکرٹری میاں افتخار حسین نے کہا ہے کہ لندن میں قتل ہونے والے اے این پی کے سرگرم کارکن سید عظیم خان کے قاتل کو جلد کیفر کردار تک پہنچایا جائے اور مستقبل میں ایسے واقعات کے تدارک کیلئے اقدامات کئے جائیں، باجوڑ میں سید عظیم خان شہید کی نماز جنازہ کے بعد فاتحہ خوانی اور اپنے تاثرات بیان کرتے ہوئے انہوں نے کہا کہ پختونوں کو دنیا بھر میں ٹارگٹ کیا جا رہا ہے جو انتہائی افسوسناک اور قابل مذمت ہے ، انہوں نے کہا کہ شہید سید عظیم ایک مخلص انسان تھے اور پاکستان میں ہونے والے مظالم کے خلاف لندن میں آواز بلند کرتے رہے جبکہ انتہائی دکھ کی بات یہ ہے کہ مظالم کے خلاف آواز اٹھانے والا خود آج ظلم کا شکار ہو گیا ہے، انہوں نے کہا کہ پختونوں کو ٹارگٹ کرنے کا سلسلہ طویل عرصہ سے جاری ہے ،اور اے این پی ان مظالم اور تشدد کے خلاف خاموش نہیں رہے گی، میاں افتخار حسین نے کہا کہ سید عظیم کی موت بلا شبہ ان کے اہل خانہ کیلئے ناقابل تلافی نقصان ہے لیکن اس کے ساتھ ہی اے این پی اور خود مجھے اس سانحہ کا دلی طور پر دکھ ہے انہوں نے شہید کی خدمات کو خراج تحسین پیش کرتے ہوئے غمزدہ خاندان کے ساتھ دلی ہمدردی کا اظہار کیا اور شہید کے بلندی درجات کیلئے دعا کی ، بعد ازاں میاں افتخار حسین باجوڑ میں ہی کراچی میں شہید کئے جانے والے احمد شاہ کے اہل خانہ سے تعزیت کیلئے ان کی رہائش گاہ پہنچے اور شہید کی مغفرت کیلئے دعا کی ، احمد شاہ کے لواحقین سے دلی تعزیت کا اظہار کرتے ہوئے میاں افتخار حسین نے کہا کہ احمد شاہ کا قتل نقیب اللہ محسود کے بعد اسی سلسلے کی کڑی ہے جس میں پختونوں کو ٹارگٹ کر کے مارا جا رہا ہے ، انہوں نے کہا کہ اے این پی اس سازش کے خلاف آواز اٹھاتی رہی ہے اور نقیب اللہ کے ساتھ ساتھ احمد شاہ کے خون کا بھی حساب لے گی۔

Facebook Comments